Abantu barenga 60 biganjemo urubyiruko batawe muri yombi n’igipolisi cya Uganda bari mu myigaragambyo yo kwamagana ruswa mu nteko ishinga amategeko na leta, nk’uko ibinyamakuru muri Uganda bibivuga.
Amashusho yashyizwe ku mbuga nkoranyambaga ku wa kabiri yerekana abapolisi bakoresha imbagara mu guta muri yombi abigaragambya bagerageje kwegera ku ngoro y’inteko ishinga amategeko mu murwa mukuru Kampala.
Abigaragambya – bafatiye urugero ku bibera muri Kenya – baranenga ko nubwo Perezida Yoweri Museveni yavuze ko yabonye ruswa mu nteko ishinga amategeko n’ahandi muri leta, nta kintu yakoze mu kuyirwanya cyangwa gukurikirana abayivugwaho.
Abigaragambya i Kampala basabaga ko Anita Among ukuriye inteko ishinga amategeko ya Uganda yegura. Among aheruka gufatirwa ibihano na Leta Zunze Ubumwe za Amerika zimushinja ruswa. Ibyaha we yahakanye.
Mu bantu batawe muri yombi ku wa kabiri abagera kuri 27 bahise bagezwa imbere y’urukiko i Kampala bashinjwa icyaha cyo guhungabanya ituze rusange, bakatirwa gufungwa by’agateganyo kugeza tariki 05 z’ukwezi gutaha kwa Kanama, nk’uko bivugwa n’ikinyamakuru New Vision.
Impirimbanyi z’uburenganzira bwa muntu zamaganye ibikorwa byo gufunga no gukoresha imbaraga z’umurengera ku bagerageje kwigaragambya ku wa kabiri i Kampala.
Ikinyamakuru Monitor cyo muri Uganda kivuga ko igisirikare na polisi bohereje ingabo n’ibikoresho mu mijyi ya Masaka na Soroti gukoma imbere abagerageza kwigaragambya.
Mu mpera z’icyumweru gishize Perezida Yoweri Museveni yavuze ko abagerageza kwigaragambya muri Uganda bazaba “bakina n’umuriro”.
Ku wa mbere, mbere y’imyigaragambyo, abadepite batatu batavuga rumwe n’ubutegetsi batawe muri yombi, nk’uko polisi yabitangaje, naho ibiro bikuru by’ishyaka National Unity Platform (NUP) rya Bobi Wine bigotwa n’igipolisi n’abasirikare, mu muhate wo gukoma imbere imyigaragambyo yo ku wa kabiri.
Depite Robert Kyagulanyi uzwi nka Bobi Wine yari yavuze ko atari mu bateguye iyi myigaragambyo yo ku wa kabiri, gusa yavuze ko ayishyigikiye.
Abanenga ubutegetsi bwa Museveni bavuga ko yananiwe kugira icyo akora kuri ruswa yamunze inzego z’ubutegetsi n’igipolisi, kandi ko nubwo yavuze ko agiye kuyirwanya nta cyo yakoze.
Ku munsi wa mbere wabo, abigaragambya muri Uganda baciwe intege bigaragara n’igipolisi, ntibizwi neza niba imyigaragambyo yabo izakomeza.
BBC
