Lucas Chevalier urinda izamu rya PSG yasuye u Rwanda muri gahunda ya Visit Rwanda
Umunyezamu w’ikipe ya Paris Saint-Germain (PSG), Lucas Chevalier uri mu Rwanda muri gahunda ya Visit Rwanda yasuye Urwibutso rwa Jenoside rwa Kigali ruri ku Gisozi, yunamira inzirakarengane zazize Jenoside yakorewe Abatutsi mu 1994.
Uyu munyezamu yageze i Kigali kuri iki Cyumweru tariki ya 8 Ugushyingo 2026 akaba yaje muri gahunda ya Visit Rwanda. Nyuma yo kuhagera yahise ajya gusura Urwibutso rwa Jenoside rwa Kigali ruri ku Gisozi, yunamira inzirakarengane zazize Jenoside yakorewe Abatutsi mu 1994.
Yasuye ibice by’urwibutso bigaragaza uko Jenoside yateguwe ikanashyirwa mu bikorwa ndetse n’urugendo u Rwanda rwanyuzemo mu kongera kwiyubaka no kwimakaza ubumwe n’ubwiyunge.
Biteganyijwe ko muri uru ruzinduko rwa Lucas Chevalier azanasura ibice nyaburanga bitandukanye bigize u Rwanda.
Kuva muri 2019 ni bwo Urwego rw’Igihugu rushinzwe Iterambere, RDB rwatangiye ubufatanye n’ikipe ya Paris St. Germain yo mu Bufaransa bugamije kwamamaza Visit Rwanda.
Binyuze mu bufatanye na Paris Saint Germain, abakinnyi b’iyi kipe n’ibindi byamamare mpuzamahanga, basura u Rwanda bakamenya amateka yarwo, bakabona ibyiza bitatse igihugu cy’imisozi igihumbi uhereye ku bijyanye n’ubugeni, umuco, siporo, muzika, ubukerarugendo n’ibindi.
Lucas Chevalier usanzwe anakinira ikipe y’igihugu y’u Bufaransa yageze muri PSG muri 2025 avuye muri Valenciennes FC ikina icyiciro cya 3 mu Bufaransa.
RDB
