Urukiko rw’ubujurire rwemeje ko urubanza ruregwamo Rusesabagina ruzaburanishwa adahari

Urukiko rw’ubujurire rwemeje ko urubanza ruregwamo abari muri MRCD-FLN ruzaburanishwa Paul Rusesabagina adahari, kuko yanze kwitaba ku bushake.

Rwategetse ko uru rubanza ruzakomeza kuwa 20 Mutarama uyu mwaka saa mbili n’igice.

Urukiko rufashe uyu mwanzuro nyuma y’impaka zo kuri uyu wa Mbere zagiwe ku ihamagazwa ry’uyu ureganwa n’abandi 20 bo bari bitabye urukiko. Uruhande rw’ubushinjacyaha n’abahagarariye abaregera indishyi ndetse n’abahagarariye bamwe mu baregwa, rwavugaga ko Rusesabagina yahamagajwe mu buryo bukurikije amategeko hakaba n’ikindi gice cy’abunganira bamwe mu baregwa cyavugaga ko kuba yarahawe ihamagazwa n’umuyobozi wa gereza atari abifitiye ububasha.

Urukiko nyuma yo kwiherera, rwemeje ko itegeko rigenga abahesha b’inkiko batari ab’umwuga riha ubwo bubasha umuyobozi wa gereza ndetse akaba ari we umenyesha abafunzwe iby’ihamagazwa mu rukiko.

Bityo rwasanze Rusesabagina yaranze kwitaba iburanisha ku bushake bwe, rutegeka ko urubanza ruzakomeza kuburanishwa adahari.

source: RBA