Umutwe wa M23 watangaje ku cyumweru ko wafashe umujyi wa Ishasha uherereye ku mupaka wa DR Congo na Uganda mu majyaruguru y’intara ya Kivu ya Ruguru muri 60km uvuye mu mujyi wa Rutshuru-Centre.
Ku mashusho yashyizwe ku mbuga nkoranyambaga na bamwe mu bakuriye M23, umwe mu barwanyi bayo yagaragaye abwira abasivile baje kubakira bati:
“M23 ije kubacungira umutekano n’ibyanyu…Barrières za FDLR ntimuzongera kuzibona, FDLR igomba gusubira iwabo mu Rwanda, aba Mai-Mai bari hano mubabwire baze dufatanye kubaka igihugu…Aho M23 iri nta kibazo gihari”.
Uruhande rwa leta cyangwa ingabo za leta ntacyo baratangaza ku ifatwa ry’umujyi wa Ishasha.
Radio Okapi ivuga ko Ishasha yafashwe nyuma y’imirwano yamaze amasaha mu gitondo ku cyumweru, hagati ya M23 n’abarwanyi bazwi nka Wazalendo ahitwa Buganza muri 12km uvuye Ishasha.
Ibi byatumye abarwanyi ba M23 binjira muri Ishasha nta mirwano ibaye muri uyu mujyi, mu gihe hashize igihe kigera ku mezi ingabo za leta zihavuye harinzwe na Wazalendo.
M23 yafashe umujyi wa Ishasha mbere y’amasaha ngo agahenge ko guhera saa sita z’ijoro ku cyumweru kumvikanweho hagati y’abategetsi b’u Rwanda na DR Congo i Luanda gatangire.
Umutwe wa M23 watangaje ko utarebwa n’ayo masezerano y’agahenge yumvikanyweho mu cyumweru gishize n’abategetsi b’u Rwanda na DR Congo kuko itari ihagarariwe.
Kuki Ishasha ari ingenzi?
Ishasha ni umujyi uri ku mupaka utuwe n’abaturage babarirwa mu bihumbi amagana, uri hafi y’ikiyaga Rwicanzige (Lac Édouard) kuri kuri 40km mu majyaruguru, no kuri 60km uvuye ku mujyi wa Rutshuru-Centre mu majyepfo, agace kose kari mu majyaruguru y’intara ya Kivu ya Ruguru.
Ishasha ni inzira y’ubucuruzi bwambukiranya imipaka hagati ya DR Congo na Uganda, inzira iva kuri uyu mupaka ica muri centre za Nyamilima, Kyeshero, Kiwanja, Rutshuru Centre, Rumangabo no kumanuka kugera i Goma.
Muri Kivu ya Ruguru, umupaka wa Ishasha uri mu ikoreshwa cyane nyuma y’uwa Goma, Kasindi muri teritwari ya Beni na Bunagana muri teritwari ya Rutshuru.
Ubukungu muri uyu mujyi bushingiye ahanini ku bucuruzi bwambukiranya imipaka n’ubucuruzi bw’amafi n’imbaho, nk’uko bivugwa n’abategetsi ba Kivu ya Ruguru.
Ishasha ni akandi gace k’ingenzi mu bucuruzi kafashwe na M23 mu gice gisatira aho muri Congo bita Grand Nord, nyuma ya Vitshumbi, Nyamilima, Kanyabayonga n’ahandi.
Mu mpera z’icyumweru gishize, igisirikare cyavuze ko kizisubiza uduce twose twafashwe na M23.
BBC
