Umunyamabanga mukuru wa ONU yamaganye igitero cyakomerekeje 8 mu ngabo za MONUSCO
Umunyamabanga mukuru w’umuryango w’abibumbye ONU, António Guterres, yamaganye igitero cyagabwe ku ngabo zawo ziri mu butumwa bwa MONUSCO ku wa gatandatu itariki 16 Werurwe.
Muri izi ntambara zabaye muri Sake hagati y’ingabo za reta ya Congo (FARDC) n’inyeshamba za M23, abasirikare umunani ba MONUSCO bakomerekejwe n’ibisasu byatewe ku birindiro byazo.
Mu itangazo ryaraye risohowe n’umuvugizi we, umunyamabanga mukuru wa ONU yibukije ko ibitero ku ngabo za ONU zishinzwe kubungabunga amahoro n’umutekano bishobora gufatwa nk’ibyaha byo mu ntambara mu mategeko mpuzamahanga.
Cyakora Farhan Haq ntavuga abateye ibi bisasu ku birindiro bya MONUSCO. Bintou Keita, intumwa idasanzwe y’umunyamabanga mukuru wa ONU akaba ari na we uyoboye ubutumwa bwa MONUSCO, ashimangira ko MONUSCO yiyemeje gushigikira amaperereza kugira ngo abakoze iki gitero bashirwe imbere y’ubutabera.
Hagati aho, umutwe wa Alliance Fleuve Congo (AFC) wo urashinja izi ngabo za MONUSCO kubogamira ku ruhande rw’ingabo za reta, ukavuga ko “umubano hagati y’uyu mutwe na MONUSCO wakagombye gushingira ku kwubahiriza amategeko agenga ubutumwa bwo kubungabunga amahoro n’umutekano”, nk’uko biri mw’itangazo nawo waraye usohoye.
Umuvugizi wa M23, Lawrence Kanyuka avuga ko ihuriro ry’imitwe ifatanyije na FARDC cyane cyane FDLR, abacancuro, ingabo z’Uburundi n’ingabo za SADC”, rikoresha “ibigo bitandukanye bya MONUSCO nk’ibirindiro n’ubuhungiro byaryo… kandi rikaba rinabikayo ibitwaro biremereye .. kandi ngo ibi ni imyitwarire ihabanye n’ubutumwa bwa MONUSCO”.
Umuvugizi w’umunyamabanga mukuru wa ONU avuga ko ingabo za ONU zoherejwe muri DRC mu rwego rw’igikorwa kiswe Opération Springbok cyatangijwe mu Gushyingo 2023, mu mugambi wo kurinda abasivire muri ako karere.
Muri iri tangazo, umunyamabanga mukuru wa ONU yongeye gusaba imitwe yitwaje intwaro yose ikorera muri DRC, gushyira hasi intwaro ndetse ikanihutira gusubiza izo ntwaro zabo. Arasaba kandi M23 kuva mu turere twose yigaruriye no kubahiriza ibiri mw’itangazo rya Luanda ryo ku wa 23 Ugushyingo 2022.
Ati: “Ubwigenge n’ubusugire bw’ubutaka bwa Repubulika ya Demokarasi ya Congo bigomba kubahirizwa”.
Umunyamabanga mukuru ashimangira ko MONUSCO ari ngombwa ko ikora inshingano zayo zo kurinda abasivire.
Hari hashize iminsi mikeya Umutwe uhuriwemo nindi myinshi wa AFC, urimo n’umutwe wa M23, usabye Inama Nkuru ya ONU ishinzwe umutekano ku isi “kwamagana ibikorwa binyuranyije n’amategeko bya MONUSCO bidahuye n’ubutumwa bwayo, amategeko mpuzamahanga ndetse n’ibyemejwe na ONU”, hari mu itangazo uyu mutwe wasohoye ku wa 28 Gashyantare.
AFC yavuga ko “MONUSCO igomba nta ruhande ibogamiyeho, igafata kimwe impande zishamiranye, nta kurobanura”.
Nubwo kugeza ubu uruhande rwateye ibi bisasu ku birindiro bya MONUSCO rutaramenyekana, muri iryo tangazo ryo mu kwezi gushize AFC yavugaga ko kubona MONUSCO irwana ku ruhande rwa reta, “bitesha agaciro ONU” kandi “bituma igaragara nk’umutwe nawo uri mu ntambara”.
BBC
